“უუუუუუ…”

“არაფერი ახალი… წლის გარდა” - საახალწლო სამზადისისა და კონცერტების შემხედვარე ადამიანი

ახალი წელი ის ერთადერთი დღესასწაულია, როდესაც ადამიანი (ჯერ კიდევ ერთი კვირით ადრე) ყველა საქმეს “ბარემ შემდეგი წლისთვის” დებს (“აი, ორშაბათიდან…”, “ხვალიდან, ნახე…”-ს მსგავსად) და იმაზე იწყებს ფიქრს – კუჭთან (ან, ღვიძლთან) ტანდემში დრო მაქსიმალურად ნაყოფიერად როგორ გაატაროს. ამ დღეებში განსაკუთრებით პოპულარული ხდება შეკითხვა “ახალ წელს რას აპირებ”, მისივე შესაბამისი - “რავი, რამეს მოვიფიქრებ” – პასუხით. პარალელურად ამისა ჩნდება კვაზიდეპრესიული სტატუსები, რომლებიც “რა მეახალწლება, თუ ძმა ხარ, სჯობს თავი მოვიკლა” პათოსითაა აღსავსე და იქით გამუნათებს კიდეც, ახალი წლის მოსვლა ზედმეტად თუ გიხარია.

“ვისაც ეზეიმება, გაატარეთ”

ამასთან ერთად, “facebook”-ელ მეგობართა სულში ვერდაუტეველი და საქვეყნოდ გამოხატული ემოციების წყალობით უკვე დეტალურად შეგვიძლია გავიგოთ ვისთან როდის და რა ვითარებაში დადგეს ნაძვის ხე ან ვის როგორი გოზინაყი გამოუვიდა. ზოგიერთები კი მოდასაც ყვებიან და თავიანთი ინდეფერენტული განწყობით (“ახალი წელი არა ისა, 12 საათზე დავიძინებ მე, მოგცლიათ…”) “სხვებისაგან განსხვავებულებად” გამოჩენას ცდილობენ. თუმცა, მანამდე არც იმის აღნიშვნა ავიწყდებათ, რომ “საახალწლო განწყობა საერთოდ არ აქვთ” და გლობალური დათბობის გადამკიდე, ცასა თუ სინოპტიკოსებს თოვლისმომლოდინე მზერასაც აპყრობენ.

რა თქმა უნდა, ვერც იმას ვხვდებით, რომ “მილოცვა” სავალდებულო პროცედურა არ არის და საერთო ტექსტის დაწერა (ან, მათი ყველა ადამიანზე მორგება) ზოგჯერ მიულოცველობაზე უარესიცაა. ისეთ “მესიჯებს” ვგულისხმობ, როდესაც ხვდები, რომ შენ კონკრეტული ინდივიდი კი არა, ერთ ქვაბში ჩაყრილი ათასგვარი ადამიანის ნაზავი ხარ და ხშირად მხოლოდ იმიტომ გილოცავენ, რომ შემთხვევით (ან კონკრეტული მიზეზის გამო) მავანთა მობილური ტელეფონის კონტაქტებში აღმოჩნდი.

მიუხედავად ყველაფრისა, ახალი წლის ღამის განმავლობაში დღესასწაულს მხოლოდ ერთ ადამიანს როცა ულოცავ ან რობინზონ კრუზო უნდა იყო, ან ორკაციანი საკნის პატიმარი, ან-აც ასოციალური იდიოტი, რაც ყველაზე ნაკლებად მაწყობს. თუმცა, ”-გილოცააავ! - მადლობა, შენც ასევე!  - მადლობა :*გაიხარე“ ტიპის დიალოგებთან “მტრული დამოკიდებულება” რომ გაქვს ადამიანს (და სიზარმაცე ყურთან მზაკვარი სახით გიხითხითებს) სხვა გზა უბრალოდ აღარ გრჩება.

სწორედ ამიტომ, დანაშაულის გამოსყიდვის მიზნით,  უკლებლივ ყველას… – კურდღლებსა და მაიმუნებს, კატებსა და ვეფხვებს, ძაღლებსა და მამაძაღლებს, მეზვრეებსა და ფარისევლებს, უძღებ შვილებსა და მაძღარ მამებს, პირღიებსა და კრიჭაშეკრულებს, ნათესავებსა და უნათესავოებს,  “facebook”-ელებსა და “ადნაკლასნიკელებს”, ვაკელებსა და “ვეიქელებს”, “M”-ებს, “L”–ებსა და  “XL”–ებს, ნინო ჩხეიძის მსმენელებსა და თიკო სადუნიშვილის მაყურებლებს, ბოჩელის ფანებსა და ბიჭოლას ფენებს (ბალიშის), ტინგიცებსა და “დასტოინებს”, “ყველაზე DZeRskEeeB”-სა და “ყველაზე LaAmMazeb“-ს, “ამაზონზე” მოვაჭრეებსა და “დეზერტირების” ბაზარში მოსიარულეებს, “ოღჩ”–თი მოსაუბრეებსა და “ოღროჩოღრო ქართულის მცოდნე” სხვა ადამიანებს, “ბარსელონას” გულშემატკივრებსა და “რეალისაგან” გულდამწვარებს, კლასისა და კარტის დამრიგებლებს, ცნობილ სახეებსა და უცნობ ტანებს, ღიპიანებსა და ჯიპიანებს, ანისა და ჰოეს, თემქელებსა და “შუა ქალაქელებს”, პრეზიდენტებსა და შინაგან საქმეთა მინისტრებს, სანტა კლაუსებსა და სვანთა კლაუსებს, აღვირახსნილებსა და ღვედშეკრულებს, პატივცემულ საჭეებს, პატ. “რულებსა” და პატ–ინსონებს, მედღეხვალიე კაცებსა და თოვლს დანატრებულებს, “ფერმელებსა” და ფორმულებს, ღირსების ორდენის მფლობელებსა და იმ სამიოდე დარჩენილ კაცს, ვისაც ის ჯერ კიდევ არ მიუღია, მაესტროებსა და კავკასიელებს, საზოგადოებრივ მაუწყებელსა და ტელევიზიებს, პირველადი დახმარების სამსახურებსა და მეორეული საქონლით მოვაჭრეებს, ერს, ბერს და ბიბერსაც, რა თქმა უნდა – …ყველას გილოცავთ ახალ დეკადაში გადაბათქაბუთქებას (თუ გადაკუნტრუშებას) და გისურვებთ, რომ:

“ბიბერ, შე ბებერო”

• სხვა წლებში ქვეყნის ყველაზე რეიტინგული ტელევიზია ახალ წელს “მამა მიასა” და “ფანტომასის” ჩვენებით აღარ “აგორებდეს”;

• ცოტა ხანში, ჩემთვის ლოტოში მილიონი ლარის მოგება მოგელოცოთ;

• სტეფანეს სიტყვა “უპრეცენდენტოს” მნიშვნელობა ესწავლოს და თავისუფლების მოედანზე გამართული, სხვა კონცერტებისაგან არაფრით გამორჩეული საახალწლო ზეიმის შეფასებისას უფრო რელევანტური ზედსართავი სახელი მოეძებნოს;

• განწირული კივილითა თუ გაურკვეველი მიზნით, სასიდან “უუ”–ს პერმანენტული, ძალისმიერი და დისფუნქციური ამოხეთქვის საიდუმლო ამოგეხსნათ;

• ეს წელი თქვენთვის ბედნიერებას, სიხარულის, ულევი სიყვარულის და ამ დროს რომ ტრადიციული ჩამონათვალი იციან ხოლმე კიდევ იმათი მომტანი ყოფილიყოს;

• ამ შარშანდელმა პოსტმა სიტუაცია გაისად ისევე ანალოგიურად არ ასახოს, როგორი წარმატებითაც ამის გაკეთება მან წელს მოახერხა.

“გადმონაშთი წინა წლის პოსტიდან”

პ.ს: ახალ სეზონს გახსნილად ვაცხადებ :შამპანურის დაბუთქუნების სმაილი: